Acts 22

1Omi azaje n na dada yi fye wo mi ɓe da. 2Shi ɓa ɓo wo woi daɓo n Ibrahim bye yi, ɓa ku gna cece pi. 3Mi zhin Yahudiya yi nu, a ma mi n Tarsus Silisiya kni. Ma zhin makaranta n ya nu n Urushelima. Galnaliyo nu ɓei zhin mi Malami, wawu mi shi mi ɓa shi a Yahudiyi owa bwa na kunnu yi, mi ɓei zhin mi yi la Shekwoyi tu cici, ngye shi fye zhin n naiye nyi. 4Ma ga ikklisiya wahala mi wan a Kristi yi anugbayi na nyikwoyi ma gu ɓa fi n kurkuku. 5Piristi dnagmayi kwo na shaula zhinyi, wo ɓa ci mi seda ge mi da gaiciya nu. Ntu ge n ɓa aba nu n mi ɓo zhin ma gwo takarda izni nya, ntu ge ma lo Dimashika ma wan a Kristi yi ɓe cei n Urushelima ntu tata ɓo.

6N wyihoi mi lo Dimashika buzangna dnagmayi nshe kwa knaya she mi gun, kwo ɓo zhin n nyipyei bwai nu vivi n Dimashika yi. 7Nsai-sa yi ma miya shi n kni, ma wo begye kwoi gna, “Shawulu, Shawulu kniyi nu zhin hoi ga mi wahala?”

8Ma nya ge, nkanu daɓo mi ya, Shekwoyi mwasa hoi, Wa gna “Omi nu Yesu Nazaratiyi n ho ga wo wahala nyi.” 9Aza nɓa ɓei gnisun n mi nyi ɓa gye buzangna, amma to ɓa gane n ɓei na da m. 10Ma nya ge, “Dagayi nɓa zhin wuna?” Dagayi wa gna mi, “Laka ha lo Dimashika aɓo wu ho ɓo nho ɓa zhin na bye deye.”

11Buzangnayi ɓo ku awye bua mi, ashi mi busi bwa shishi nu ma lo Dimashika. 12Hananiya ɓei zhin Shekwoyi za nu woi vi a Yahudiyi o wa, ɓai kpe wo ye vinya n Dimashika ntu wo hali manayi ɓo. 13Oza ye wa ɓe mi aba wa gni vivi n mi, Yi wa gna, “Omizado Shawulu. Gwo wyeba gye,” n sai-sayi ma mi ma gye wo wye n anya yi nɓa ɓo she mi gun nyi.

14Wa gna mi ge, Shekwoyi eyi dada nya n la ho kni, ha kpe wo ɓemwi ye, ha gye Masihu ha wo wo ɓeda. 15Ho ɓa da owo nabari aba vinya. Ho ɓa da enya n ha wo n nya yi nha gye. 16Kniyi nu ɓa zhin ha zhin kalala? Laka azhin ho batizma a zhan ho alaifi ya, ha yi Shekwoyi. 17N wyihoi mi dna aduwa nyakun mi-i zhin aduwa ma nu ena. 18Ma gye Shekwoyi woi gna mi ge, Laka ha fa Urushelima ntu ge aza ta kna ho ɓeda tnubua n ya m.

19Ma gna ge, Dagayi ɓa kpe lo vinya ge ma ku oho a viyi ga wahala, mi yi fi ɓa n kurkuku. 20Sa aɓo wu Istifanus cei nyi mi ɓei gni, mi nu ɓo go aje n aza ɓo kma zhin, ɓa kpe wo akuta kni nyi.

21Amma Shekwoyi wa gna ge, “Fa Urushelima gama mi ye ma tnu ho n kpai nu abye do aba.”

22Shi Bulus ɓo sa abyedo ye, ɓa je kala ku n wyiɓoyi n kala yi ngye anya-cei. Ɓai gna, alo woi, a wu wo, ko to kunce lo oza deye wa bwa wye-wyei m. 23Ɓa gyi abye n wyiɓo yi, ɓai she aje ya gun she, ɓai she amwi ya laɓa.

24A soja tukwoda walo dna n Bulus yi n nyakun, wa gna soja ho ge wo lu wo ntu ge wa da wo alaifi. Wo ɓo zhin lonu ntu ge wa kpe dalili nkwo zhin a Yahudiyi ɓai zhin aɓo ngye anyacei.

25Shi ɓa ɓo la wo pa ge ɓa lu wo, Bulus wa nya soja yi ge, kwo wu lo dai-dai a lu Romayi za to ai da wo owan?

26Shi wo ɓo nya wo lonu, wa laka wa lo asoja tukwoda aba, wa nya wo ge kniyi nu ho zhin a? Gye oza deye zhin Romayi nu.

27Soja tukwoda wa lo wa nya Bulus ɓo, “Gna mi, ho zhin Romayi za nu?” Bulus wa gna mi zhin kwo nu. 28A soja tukwoda wa ci ge kafin mi zhin Romayi za miɓo ku agyiwye wu n mwa. Amma Bulus wa gna wo ge mi da to sisi nu m, a ma mi mama nu n zhin Romayi za. 29A soja n ɓa ɓo ye ɓa lu wo nyi, shi ɓa ɓo wo ge wo zhin Romayi nu, ɓa busi. A soja tukwoda n wohin wa wo dna ntu ge wo ku gna a soja ge ɓa pa wo ɓa lu wo.

Bulus Gni Nna Shaula Zhinyi Abye

30Efya gyi a soja tukwoda wa wo loya wayi a prist dnagmayi ɓa yezhi, wa ɓe n Bulus yi n ɓa bye ntu ge wa wo dalili nkwo zhin ɓai lagyi-kici ka dna n zhimi.